ദൈവത്തിന്റെ പുസ്തകം (God’s Own Book)
കെ പി രാമനുണ്ണി
അമേരിക്കയില് നാസയുടെ കേപ്പ് കാനവറല് വിക്ഷേപണകേന്ദ്രത്തില് നിന്നും തുടങ്ങുന്ന കഥ. അവരുടെ വിക്ഷേപണ പരാജങ്ങളെ ഇവിടെ ശ്രീഹരി കോട്ടയില് ശാസ്ത്രജ്ഞന്മാര് വിലയിരുത്തുന്നു. അതില് ഡോക്ടര് കുട്ടിശങ്കരനുണ്ട്, ഡോക്ടര് ഹസ്സന് കുട്ടിയുണ്ട്. രണ്ടു പേരും കുട്ടികള്! രണ്ടു പേരും മലബാറികള്! ഒരാള് പൊന്നാനിയില് നിന്നും മറ്റെയാള് ബേപ്പുരുനിന്നും. രണ്ടു പേരും അവിവാഹിതര്! സ്റ്റീഫന് ഹോക്കിങ്ങിന്റെ സിദ്ധാന്തങ്ങള് വെച്ച് തമോഗര്ത്തത്തെയും അതിന്റെ പരീക്ഷണങ്ങളിലൂടെ കടന്ന് ഗ്രാവിറ്റെഷണല് വേവ് ഡിറ്റ്ക്ടര് പോലുള്ള ഉപകരണത്തിന്റെ കണ്ടുപിടുത്തം നടത്തിയവര്.
നാസയുടെ വിക്ഷേപണ പരാജയങ്ങളില് ചിലര് സന്തോഷിക്കുന്നുണ്ടെങ്കിലും അവസാനം അവര് ഒരു നിഗമനത്തില് എത്തുന്നു.
“യെസ്, സ്പേയ്സ് സയന്റിസ്റ്റുകള്ക്കും എഞ്ചിനീയര്മാര്ക്കും ഒരിക്കലും രാജ്യാതിര്ത്തികള് പാടില്ല.”
ഈ കുട്ടിശങ്കരനിലൂടെ, പുറകോട്ടു സഞ്ചരിച്ച് ദ്വാപരയുഗത്തില് കൃഷ്ണനിലേക്കെത്താം. അതുപോലെ ഹസ്സന് കുട്ടിയിലൂടെ, പുറകോട്ടു സഞ്ചരിച്ചാല് ഹിജാസിലെ മക്ക്യ്ക്കടുത്ത് മുഹമ്മദ് നബി സ്വല്ലല്ലാഹു അലൈഹി വസല്ലത്തിലേക്കെത്താം.
ദ്വാപരയുഗത്തില് കൃഷ്ണന് പോറ്റമ്മ യശോദയായിരുന്നു.....ഇവിടെ ആറാം നൂറ്റാണ്ടില് നബിയ്ക്കു പോറ്റമ്മയായി ഹലീമയും.
കൃഷ്ണന് അനേകം ഭാര്യമാര് ഉണ്ടായിരുന്നു ..... നബിയ്ക്കും ഭാര്യമാര് ഉണ്ടായിരുന്നു..... കൃഷണന്റെ കാമുകി കൃഷ്ണനെക്കാള് മൂത്തതായിരുന്നു ..... നബിയുടെ ഭാര്യ ഖദീജയും അതുപോലെ .....
അനേകം യുദ്ധങ്ങളിലൂടെയും അനേകം പ്രണയങ്ങളിലൂടെയും കൃഷ്ണന് സഞ്ചരിക്കുന്നു ........നബിയ്ക്കും അത് വേണ്ടി വരുന്നു .......
അങ്ങനെയങ്ങനെ....മാര്ക്സിലേക്കെത്തുന്നു........
മാര്ക്സിന്റെയും ജെന്നിയുടേയും.......അതീവ പ്രണയങ്ങള് കവിതാമയമാകുന്നു.....
മാര്ക്സിന്റെ ജീവിതം അനേകം ത്യാഗങ്ങളുടെയും ജീവിതം പോരാട്ടങ്ങളുടെയും ആയിരുന്നല്ലോ.......
ഇവിടെയും രസകരമായ ഒരു സാദൃശ്യം മാര്ക്സിനേക്കാള് മൂത്തവള് ആയിരുന്നു ജെന്നി.......! ഇരുവരും അഗാധ പ്രണയത്തില് ലയിച്ചു പോവുകയും ചെയ്തു. മാക്സിനും വീട്ടില് ഉണ്ടായിരുന്ന അവരുടെ സഹയാത്രികയോട് അഭിനിവേശം ഉണ്ടായി. ദ്വാപരയുഗത്തില് നിന്നും ഇങ്ങോട്ടു വരുമ്പോള് പ്രണയത്തിനു ലോപം സംഭവിക്കുന്നതായി കാണാം.
കമ്മുണിസ്റ്റുകാര് മാത്രമല്ല വലിയ എഴുത്തുകാരും ശാസ്ത്രജ്ഞരും തത്വചിന്തകരും അദ്ദേഹത്തിന്റെ വസതിയിലെ സന്ദര്ശകരായി മാറി. ആ സിംഹമുഖത്തു നിന്നുള്ള ഉദ്ദീരണങ്ങള്ക്കായി ഏവരും കാത്തു നിന്നു.
“ബൂര്ഷ്വാ ജനാധിപത്യപ്പകിട്ടുകളില് പെട്ടുപോകാതെ എപ്പോഴും ജനകീയ ജനാധിപത്യത്തെ ഉയര്ത്തിപ്പിടിക്കുക. അന്തര്ദേശീയതയുടെ പേരില് ദേശസ്നേഹം വെടിയാതിരിക്കുക. ദേശസ്നേഹം സങ്കുചിത ദേശീയതയായി ചുരുങ്ങാതെയും സൂക്ഷിക്കുക”
ദാരിദ്യം നിറഞ്ഞ ജീവിതം. പട്ടിണി കിടന്നു ഉറങ്ങുന്ന കുട്ടികള്. അവസാനം അവരുടെ മരണങ്ങള് കാണേണ്ടി വരിക....... ഇതിനിടയിലും അഗാധമായ ജെന്നിയുടെ പ്രണയം.. 1881 ഡിസംബര് രണ്ടിന് ജെന്നിയുടെ മരണത്തോടെ ആന്തരികമായി മാര്ക്സും മരിക്കുകയാണ്.
“മൂറും മരിച്ചു, മൂറും മരിച്ചു.”
തകര്ന്ന് തരിപ്പണമായിപ്പോയ അവസ്ഥ കണ്ട് എംഗല്സ് എന്ന ലോകോത്തര ചങ്ങാതി പുലമ്പിപ്പോയി.
പിന്നെ അധികം വൈകാതെ 1883 മാര്ച്ച് പതിനാലിന് മാര്ക്സും യാത്രയായി.
അങ്ങനെ ലോകത്തിനു മുന്നില് പുതിയ വഴികള് തുറന്നു കാണിച്ച ആ വലിയ മനുഷ്യ സ്നേഹിയും വിട പറഞ്ഞു.
എന്നാല് അദ്ദേഹം തൊടുത്തു വിട്ട ചിന്തകളുടെ അസ്ത്രങ്ങള് ലോകത്തിന്റെ പല ഭാഗങ്ങളിലും പതിച്ചു. അതിന്റെ ഉണര്വ്വില് റഷ്യയില് ലെനിന്റെ നേതൃത്വത്തില് വിപ്ലവങ്ങള് ഉണ്ടായി. അത് ചൈനയിലേക്കും ക്യൂബയിലേക്കും ലോകത്തിന്റെ നാനാ ഭാഗങ്ങളിലേക്കും പടര്ന്നു.
വര്ഷങ്ങള് കഴിയുന്തോറും പല തരം മാര്ക്സിസങ്ങള് പെറ്റുപെരുകി അവയ്ക്കെല്ലാം പുസ്തകങ്ങള് പുറത്തുവരുന്നു. ഹിസ്റ്റോറിക്കല് മാര്ക്സിസം, ഫിനോമെനോളൊജിക്കല് മാര്ക്സിസം, അനാലിറ്റിക്കല് മാര്ക്സിസം, ഹെഗേലിയന് മാര്ക്സിസം ......!
വെട്ടലുകളും തിരുത്തലുകളും നവീകരണപ്രക്രിയകളുമായി കൃഷ്ണ-നബി ദ്വയങ്ങള് പത്തൊമ്പതാം നൂറ്റാണ്ടിലൂടെ ഇരുപതാംനൂറ്റാണ്ടിലൂടെ സഞ്ചരിച്ച് അഡോള്ഫ് ഹിറ്റ്ലര് എന്ന ഭീകരന്റെ നാള്വഴികളും കടന്നു മഹാത്മാഗാന്ധിയിലെത്തി.....
ഇന്ത്യയ്ക്കു സ്വാതന്ത്ര്യം നല്കുമ്പോള് അതിന്റെ കരിനിഴലായി ഇന്ത്യയെ വെട്ടി നുറുക്കുവാനും ബ്രിട്ടന് തീരുമാനിച്ചു. ഇന്ത്യയുടെ പ്രധാനമന്തി സ്ഥാനം, ജിന്നയ്ക്ക് കൊടുക്കാം .....എന്നാലെങ്കിലും ഇന്ത്യ വിഭജിക്കാതിരിക്കട്ടെ ....എന്ന് ബാപ്പുജി കണക്കു കൂട്ടി. നെഹ്രുവുണ്ടോ അതിനു സമ്മതിക്കുന്നു!.......
അവസാനം സ്വയം പ്രധാനമന്ത്രി ആകാം എന്ന് ബാപ്പുജി തീരുമാനിക്കുമ്പോഴേക്കും സമയം ഒരുപാട് വൈകിയിരുന്നു. അതിന്റെ ദുരന്തം ഇന്ത്യ മുഴുവന് അനുഭവിക്കേണ്ടി വരുന്നു. സായിപ്പിന്റെ ദുഷ്ടബുദ്ധി മനുഷ്യനെ വികഘടിപ്പിച്ചു ഭരിക്കല്! അവര് പോയാലും ഇന്ത്യ രണ്ടായി നില്ക്കണം. പരസ്പരം തല്ലൂടണ൦.
സായിപ്പ് പോയി, വര്ഷങ്ങള് കഴിഞ്ഞു. ഒരു ഇന്ത്യക്കാരനും സായിപ്പിനോട് വിരോധം ഇല്ല. ഒരു പാകിസ്ഥാനിക്കും സായിപ്പിനോട് വിരോധം ഇല്ല. വിരോധം പരസ്പരമാണ്. ഇന്ത്യയും പാകിസ്ഥാനുമായാണ് യുദ്ധം ഉണ്ടായത്. അയല്രാജ്യങ്ങളാണ് ബദ്ധശത്രുക്കള്! അതുകൊണ്ടെന്താ ....രണ്ടു രാജ്യങ്ങളും പുരോഗമിക്കുന്നതിനു പകരം മുരടിച്ചു നില്ക്കുന്നു.
സ്വാതന്ത്ര്യം കിട്ടുന്ന സമയത്ത് മഹാത്മാ കല്ക്കത്തയില് ആയിരുന്നു. അവിടെ ഹിന്ദു മുസ്ലീം ലഹള പൊട്ടി പുറപ്പെട്ട ഇടങ്ങളില് തെരുവുകളിലൂടെ നടന്നു. അദ്ദേഹത്തിന്റെ സാന്നിധ്യത്തില് ലഹളകള് കെട്ടടങ്ങി. എന്നാല് ആയിരക്കണക്കിനു പോലീസും പട്ടാളവും നിരന്നിട്ടും ഡല്ഹിയിലും പഞ്ചാബിലും മറ്റും ലഹളകള് അടങ്ങിയില്ല. നെഹ്രുവും പട്ടേലും ജിന്നയും ബ്രിട്ടനും ആ ഒറ്റയാള് പട്ടാളത്തെ നോക്കി അമ്പരന്നു നിന്നു.
ഇന്ത്യയ്ക്കുള്ള സ്വാതന്ത്ര്യ സന്ദേശം എന്താണ് എന്ന് ചോദിച്ചപ്പോള് :
“ഒരു സന്ദേശവുമില്ല”
എന്ന മറുപടിയില് ഒതുങ്ങി.
കൊച്ചു കുഞ്ഞുങ്ങളുടെ മഷിയിറക്കുന്നപോലെ മനുഷ്യകുലത്തിന്റെ പഴയ പാപശേഖരങ്ങളെല്ലാം പുറത്ത് തൂവിക്കലായിരുന്നു ഈ ഭൂലോക ഉഴുതുമറിച്ചലിന്റെ കേവല ഉദ്ദേശ്യ൦.
തങ്ങളുടെ ഗ്രാവിറ്റേഷണല് വേവ് ഡിറ്റക്റ്റര് നിരീക്ഷണത്തില് നിന്നു യാതൊരുവിധ ചാഞ്ചാട്ടങ്ങളുമില്ലാത്ത കൃത്യമായ തമോഗര്ത്ത ആഗമാനമാണ് ഇക്കുറിത്തേതെന്ന് കുട്ടിശങ്കരനും ഹസ്സന്കുട്ടിയും തിരിച്ചറിഞ്ഞിട്ടുണ്ട്.
എന്നാല് ദു:സ്വപ്നത്തിനിടയിലും ഉറപ്പുള്ള പ്രഭാതപ്രതീക്ഷപോലെ അവരും അങ്ങേയറ്റം പ്രസന്നരായിരുന്നു.
ഇങ്ങനെ ലോകം വിവിധ വഴികളിലൂടെ വിവിധ ആശയങ്ങളിലൂടെ സഞ്ചരിച്ചുകൊണ്ടേയിരിക്കുന്നു. അതില് ഒരുപാട് പ്രതീക്ഷകളും ഉണ്ട്.
ഇതാണ് ഞാന് വായിച്ച - ദൈവത്തിന്റെ പുസ്തകം.
അതിഗഹനമായ ഈ വലിയ പുസ്തകത്തിന്റെ കാഴ്ചകളിലൂടെ കടന്നു പോകുവാന് എനിക്കും കഴിഞ്ഞു എന്നേ പറയുന്നുള്ളൂ. അതിന്റെ വിലയിരുത്തലുകളും പഠനങ്ങളും ഇനിയും ധാരാളം വരും .
......
രാജൻ പെരുമ്പുള്ളി
No comments:
Post a Comment